ESCALANTE CITY – Padayon karon ang imbestigasyon nga ginapatigayon sang Escalante City Police Station agud mahibaluan kon bala ano ang motibo sa natabo nga pagtiro patay sa isa ka konsehal sang amo nga ciudad kahapon.
Ang biktima nga si Councilor Bernardino ‘Toto’ Patigas, 72 anyos kag residente sang Sitio Cogon, Brgy. Alimango, Escalante City ang magapauli na kuntani sa iya puluy-an sakay sang iya motorsiklo sang ini ang gintiro sang mga suspek nga naga-angkasanay sa motor sa area malapit sa Purok High School, Brgy. Alimango.
Nahibaluan nga naghalin sa iya pangampanya ang biktima sang gintiro sang wala pa makilala nga mga suspek gamit ang .45 calibre nga armas.
Si Patigas nag-angkon sang isa ka pilas sa iya likod kag duha sa ulo nga amo naman ang gintunaan sang iya kamatayon.
