General Santos City—Angol ang asawa sa pulis human gipusil sa wala mailhing suspek alas 6:10 ang takna sa gabie kagahapong adlawa sa may Block 4, Bulaong Vill., Barangay Labangal, Gensan.
Biktima giilang si Teresa Mae Enoy, 27, residenti sa nasampit nga lugar. Sa inisyal nga imbistigasyon sa Police Sation 2 nasayran nga igo rang mipalit ug kape sa tindahan duol sa ilang balay ang biktima uban sa iyang banang pulis nga si Po1 Jhon Mark Enoy, legal age, nakabase sa City Intelligence Branch, residenti sa nasampit nga lugar.
Pauli na unta ang duruha sa ilang panimalay dihang kalit silang gipusil sa duha ka suspek nga sakay sa XRM nga Motorsiklo. Swerting wala maigo ang pulis apan naigo ang asawa niini duha ka higayon sa iyang likod nga bahin.
Paspas nga misibat ang mga suspek sa wala sayring lugar, samtang ang biktima daling gidala sa Mindanao Medical Center human sa insidenti.
Sumala ni Police Sr. Inspector Robert Fores, Deputy Chief Of Police sa Police Station 2, nga posibling target sa pagpamusil ang pulis nga si Po1 Enoy. Gikaingong posibling giatngan nang daan sa mga suspek ang magtiayon sa lugar ug gipamusil.
Sa karon ginasuta pa sa Police Station 2 ang motibo sa pagpamusil samtang usa sa mga anggulong ginatutukan ang kalabutan sa trabaho sa pulis.
