Pilason ang isa ka miembro sang PNP matapos nga gin-ambush pasado alas 10:30 kaina sang aga sa Sofia Gonzaga Avenue, Camelot Village 1, Barangay Estefania, Bacolod City malapit sa Romanito Maravilla National High School.
Ang biktima nga nag-angkon sang slight injuries sa iya ulo kag abaga ang ginkilala kay Police Master Sergeant Miguel Perez, 43 anyos kag assigned sa Admin/Legal Office sang NOCCPO.
Sa inisyal nga imbestigasyon sang mga kapulisan sa pagpanguna ni P/Major Charles Gever Hepe sang PS4, ang biktima sakay sa iya nga Toyota Wigo, kolor blue, sang ini ginpaarakan sang mga suspetsado gamit ang M-16 armalite rifle, basi sa mga basiyo sang bala nga narecover sa lugar sa diin natabo ang insidente.
Ang mga katapo sang Scene of the Crime Operative ukon SOCO ang nagapatigayon naman sang imbestigasyon samtang ang biktima ang gindala sa isa ka pribado nga ospital diri sa syudad sang Bacolod.
Padayon pa ang imbestigasyon sang mga Kapulisan sang PS4, kon ano ang motibo kag sin-o ang mga suspetsado sa nasambit nga ambush.
[image: image.png]
