General Santos City— Giparelib gilayon ni Police Senior Superintendent Romeo Ruel Berango, acting city director sa Gensan City Police Office si PO3 Norbert Ferolin human mag-maoy ug namalikas sa kapulisan sakop sa City Public Safety Company, ala una ang takna sa buntag sa may P. Acharon Blvd. ning dakbayan.
Pamahayag ni Col. Berango nga iyahang ipabutang sa CPHAU si PO3 Ferolin aron usab nga mahatagan ug leksyon human ang maong insidente. Sumala niya nga dili niya i-tolerate ang unsa mang sayop nga himuon sa iyahang mga sakop nga makahatag ug kadaut sa ilahang uniporme.
Dugang pamahayag ni Col. Beragno nga mag-atubang ug kasong adminsitratibo si Ferolin human sa pagpamalikas niini ngadto sa kapulisan ug aduna pa’y dala samtang naka-inom. Gani gibutyag niini nga gidis-armahan siya sa kapulisan human nga mapa-blotter sa Police Station 1 human ang maong insidente.
Saysay pa ni Col. Berango nga magdepende sa gibug-aton sa kaso nga ipasang-at kaniya kung siya madismiss o dili, apan iyahang gipaniguro nga dili kini mamahimong abswelto. Kalabot niini, gibutyag ni Col. Berango nga kanhi ng napriso si PO3 ferolin apan dili lang niya mabutyag kung sa unsa nga kaso.
Samtang iyahang giangkon nga dili tanang pulis sa Gensan City Police Office tarong, aduna matud pay uban nga salawayon, rason nga higayon nga adunay mga kabuang iyaha gyud kining disiplinahon. Isip pulis, sila matud pa ang dapat nga nagapatuman ug balaud ug sila usab ang dapat numero uno nga mutuman niini ug kini ang lakip sa ilahang mandato.
