Arakan, North Cotabato—Patay ang usa ka Police apil na ang target suspect sa usa ka operasyon nga nahitabo sa Arakan North Cotabato.
Ang biktimang pulis nga namatay mao si Police Master Sergeant Rofel Manuel, 41 anyos, nga nakabase sa Arakan Municipal Police Station ug residente sa Barangay New Cebu, President Roxas, Cotabato human nga napusilan sa target sa implementasyon sa warrant of arrest nga gipahigayon kagahapong adlawa, Oktubre 22, 2020, alas 8:00 sa buntag.
Sa maong operasyon patay usab ang target sa operasyon nga nailang si Arnold Maligatong, 40 anyos, kanhing miyembro sa Philippine army ug residente sa Sitio Pine Tree, Barangay Libertad, Arakan, North Cotabato ug kasamtangang gatrabaho isip usa ka gwardya.
Subay sa report sa kapulisan, igo lang unta nga mo-served ug warrant of arrest ang tropa ni Manuel batok sa suspek gumikan sa kaso niining murder, apan paspas nga nakabantay ang suspetsado nga adunay padulong nga tropa sa kapulisan mao nga nikuha kini sa iyang armas ug gipabuthan ang biktima.
Maayung pagka-igo sa pulis samtang nakabalos man usab dayon ang mga kaubanan niini kung asa igo usab ang suspetsado nga maoy hinungdan sa kamatayon niini.
Daling gipangdala sa ospital ang mga nasangpit apan tungod sa kalayo sa balay tambalanan sa lugar, nakabsan gayod sa ilang kinabuhi ang biktimang si Police Master Sargeant Manuel apil na ang suspetsadong us aka kanhing sundalo.
