Patay ang isa ka pulis kag pilason naman ang policewoman nga upod sini matapos tiruhon sa quarantine checkpoint sa Poblacion, Esperanza, Sultan Kudarat, pasado alas 11 kaina sang aga, Hulyo 2, 2020.
Ginkilala ang napatay nga pulis nga si Police Executive Master Sgt. Arnold Paclibar, matapos nga nakaangkon sang igo sang bala sa ulo nga nangin tunaan sang iya hinali nga kamatayon.
Suno kay PNP 12 Regional Information Officer Lt. Col. Lino Capellan ginluthang sang suspek ang pulis, samtang masako ini sa pagsikyar sa mga dokumento sang ginasakyan nga motorsiklo sang suspek.
Samtang lakip man sa gintiro sang suspek ang upod nga policewoman sang biktima nga nakaangkon sang pilas sa wala nga parte sang iya nga kamot.
Nakaluwas naman sa insidente ang upod nila nga barangay tanod.
Sa subong suno kay P/Lt. Col. Capellan nagapadayon ang imbestigasyon sang Esperanza PNP sa nagluntad nga insidente kag pagkilala sa suspek.
