General Santos City— Tulo patay sa nahitabong pagpamusil sa may Polomolok, South Cotabato kagabii lang partikular na sa may Mang Empoy lechon House nga nahimutang sa may National Hi-way, Prk. Pag-asa, Brgy. Magsaysay samtang laing lima ang samdan.
Ang mga namatay ang naila sa pangalang Police Senior Inspector Hernan Gabat, deputy station commander sa Polomolok Municipal Police Station, Rio Salig Sr. ug Karl Plomillo.
Samtang ang mga sandam ang naila nga silang Edgar Luzon, Riza Diamante, Jade Silva, Relyn Pitogo ug Garizalde Villacora.
Sumala pa nga mangaon lang sa maong lugar ang mga biktima dihang kalit nga gipabuthan sa wala pa mailhing suspetsado.
Anaa usab sa maong lugar ang usa ka kagawad nga si Cariaga ug swerteng wala ma-igo dihang gipabuthan ang grupo ni PSI Gabat.
Gidala pa sa balay tambalanan ang mga biktima, kung asa gideklarang dead on arrival si PSI Gabat samtang namatay dihang ginatambalan silang Salig ug Plomillo.
Samtang ang ubang mga biktima ang padayong nagpaalim sa balay tambalanan human maangin sa maong pagpamusil.
Narekober gikan sa Crime Scene ang mukabat sa 30 ka mga basyo sa caliber 5.56 mm, tulo ka mga metal fragments ug usa ka slug sa susamang kalibre sa armas.
Sa kasamtangan, padayon ang ginahimong imbestigasyon sa kapulisan bahin sa maong insidente.
