CALATRAVA, NEGROS OCCIDENTAL – Ginabulubanta nga indi magnubo sa 15 ka armado nga mga kalalakihan ang nag ambush patay sa plantador nga si Norberto ‘Bebe’ Lumayno, 67 years old kag sa iya driver nga si Danilo Braga sang Hunyo 22 sa Spur 8, Minapasok, Calatrava.
Suno sa hepe sang Calatrava PNP nga si Police C/insp. Joel Batusbatusan indi pa nila tubtob sa karon ma confirm kon bala ang nag ambush sa mga biktima ang miembro gid man sang New People’s Army (NPA).
Sa imbestigasyon sang Calatrava PNP nakita nga halos maguba ang Isuzu pick-up sang biktima bangud sang madamo nga bala nga nag-igo sa salakyan kag ginbuka pa ang windshield posible agud siguraduhon sang mga suspek nga mapatay gid ang biktima.
Samtang, sa malapit nga lugar sang natabuan sang ambush, may naka enwkentro nman ang army nga ginapatihan katapo sang NPA kag amo man ang responsabli nga nag ambush kay Lumayno kag sa iya driver.
Ang enkwentro natabo sa Sitio Mahusay, Brgy. Cambayubo, Calatrava kag naglawig sang halos 15 minutos.
Ginpahayag ni 62nd Infantry Battalion Commander Lt. Col. Darell Bañez, nga amu ang incharge sa Nothern Negros nga narecover nila sa lugar ang isa kalibre .45 kalibre nga pistola, backpack, granada, flag sang NPA kag subersibo nga mga dokumento.
Suno kay Bañez, kabahin ini sang desperado nga lihok sang CPP/NPA para pahugon ang masa kag mga tag-iya sang duta para mahatag ang gusto nila nga revolutionary tax.
Ginakondenar ini Bañez ang insedente bangod klaro ini nga paglapas sa ginasiling tawhanon nga kinamatarong. . Ginlaragway niya man ang CPP/NPA bilang anti-development, anti-people, anti-moral, anti-spiritual kag anti-peace sa diin ang ila presensya ang nagahatag lang sang kakugmat kag kahadlok sa masa.
Nagapawagan man ini sa mga pumoloyo nga ireport gilayon ang presensya sang mga rebelde sa ila lugar para matagaan sang gilayon nga pagtamod.
