Davao City – Nabahin karon sa duha ka mga kampo ang katawhan sa Davao sa hisgotanang pagbungkag sa kontrobersyal kaayong Commission on Human Rights (CHR) gumikan sa perception nga lahi ra ang aktwal nga mga aktwasyon niini itandi sa iyang mandato ubos sa 1987 Philippine Constitution.
Usa sa nilutaw nga opinyon mao ang ideya nga inay bungkagon ang CHR pinasubay sa gitinguha mismo ni Pres. Rodrigo Duterte, mas kritikal ang pagbalasa sa liderato niini.
Segun kang KABAYAN Partylist Rep. Harry Roque, mas importante alang kaniya ang pagsuta unsa ba ang aktwal karon nga papel gihuptan sa CHR ubos sa liderato ni chairman Chito Gascon.
Matud ni Roque, kinsa Executive Director usab sa CenterLaw Philippines, una na niyang gisupak ang pamaagi sa pagpatuman sa ilang tahas ubos kang Gascon nga daw gipaluyuhan na man hinoon niini ang mga akusasyon kontra sa gobyerno sama niadtong gipasibaw sa mga political detractors sa pamunuan.
Hinoon, aduna usay nagtoo nga may igong katarongan nga wagtangon na lamang kini sa hingpit gumikan daw nahimo na man hinoon kining tigpamaba sa mga rebelde ubos sa landong sa New Peoples Army (NPA), dugang lamang nga gasto ug palas-onon sa kaban sa nasud ingon man daw kanunay nabutang sa disbalanse ang mga state kun government troopers sanglit nabale-nada man ang pagdepensa sa katungod sa mga awtoridad.
Ubos sa Article 13 sa 1987 Philippine Constitution, ang estado gimandoan nga mag-instalar ug pupaigong mekanismo alang sa pagpatunhay sa social justice ug human rights sa tanan.
Kasamang June Duterte
