Iligan City- Samad sa tangkugo, ingon man sa bagul-bagul ang naangkon sa purok President ug igsuon niini human kini gisulong sa pito ka mga Maranao ug gilayong gibunalan pasado alas 8 ang takna kagabie didto mismo sa ilang panimalay sa may purok 13-A Pala-o ning syudad sa Iligan.
Ang mga biktima nailang si Marvin Castillon 41 anyos minyo ug presidente sa maong dapit samtang ang igsuon niini mao si Marlon 48 anyos residente usab sa nasangpit nga lugar nga daling gidala sa City Hospital dihang gibunalan ug tubo sa nasangpit nga mga suspetsado.
Gilayong miresponde ang kapulisan sa Station 5 ug daling nasikop ang mga suspetsado nga sila si Nager Bunza, 24 anyos, way trabaho; Junaid Usman 22, anyos, way trabaho; Akayle Alim 18 anyos, way trabaho; Muhammad Lidangan 19, anyos, way trabaho, Najeb Lidangan 24 anyos, way trabaho; Calim Lidangan 26 anyos minyo ug way trabaho; Jumra Dandasalan 26 anyos, puros mga residente sa Purok 13 Barangay Bonbonon sakop sa dakbayan sa Iligan.
Samtang gidala usab sa E and R Hospital ang kauban niini nga si Amiel Sirad 21 anyos human kini ma dunggaban sa wala gikatahong suspetsado.
Narekober usab sa maong panghitabo ang 5 ka motorsiklo nga gigamit sa mga suspetsado.
Kusganong mupasaka ug kaso ang maong mga biktima diin gikaingong daang panagbingkil maoy nakitang hinungdan sa nasangpit nga insidente.
