Davao City – Patay ang usa ka drug pusher human namusil sa mga otoridad nga mudakop unta kaniya atol sa gikasa nga buy-bust operation sa may Panacan ning siyudad Sabado sa gabii.
Napuntingan sa pagpusil sa mga kapulisan ang patal nga bahin sa lawas resulta sa hinanaling kamatayon sa suspek nga si alyas Atok nga nahitabo alas-10:40 Sabado sa gabii.
Nakadawat og impormasyon si Police Chief Inspector Reuben Libera, Hepe sa Presinto 4 gikan sa importante nga nagpayuhot og ilegal nga droga sa suspek sa may Malagamot Panacan.
Gilayon gipailawom sa pagtiktik sa intel operatives si alyas Atok ug dihang nakumpirma ang ilegal nga kalihukan sa suspek gilayon gikasa ang operasyon subay sa mando ni Libera ngadto sa ginsakpan sa Station Drug Enforcement Unit.
Apan, abtik nakabantay ang suspek nga pulis ang iyang gikatransak maong mibunlot kini og pistola dayon pusil ngadto sa otoridad apan maayo na lang kay natapion ang kamot sa pusher hinungdan wala maigo ang poseur buyer nga pulis.
Abtik nakabalos og pusil ang operatiba nga misangko sa hinanaling kamatayon sa suspek diin gisuwayan pa kini og dala sa Spmc apan gideklara gihapon nga dead on arrival sa mihiling nga doktor.
Narekober sa nahitaboan ang .38 nga kalibre sa pistola, selpon, ug usa ka sachet sa shabu gikan sa suspek nga giilang sa tinuod nga pangalan nga si Ronny Mohamad, hamtong ang pangedaron, ug nagpuyo sa Madaum, Tagum City.
Ilado matud pa nga tigpayuhot sa iligal nga droga ang suspek sa may Panacan ug sa Tagum City.
Ang patay’ng lawas sa suspek anaa na sa morgue sa SPMC.
RadyoMaN Joel Viray
