General Santos City—Gikasuhan na ug kasong pagsupak sa RA 9165 sec 5 ug 11 sa art II kon Comprehensive Dangerous Drugs Act of 2002 ang usa ka Saidali Binasin alyas Sonny Boy, 42 anyos nga nanimuyo sa Alunan, Barangay Bula ning syudad human nga masikop kini sa gipahigayong buy-bust operation sa Police Station 6, alas 10:00 pasado ang takna sa buntag sa mismong lugar sa suspect.
Sumala pa ni Police Major Tirsu Pascual ang hepe sa Police Station 6 nga dugay na nila ginagukod ang nahisgutang suspect tungod kay nalakip matud pa kini sa ilahang watch list bisan paman niadtong anaa pa kini na-assign isip labaw sa CPDEU ang target na usab nila ang nahisgutang suspect.
Idlas matud pa kaayo ang nahisgutan hinungdan nga dili nila madakpan ug kalit lang matud pa kining nawala sa syudad apan niadtong milabay nga adlaw sa dihang mibalik kini sa Gensan gilayon nilang gikasa ang buy-bust nga miresulta sa pagkasikop niini.
Basi sa pag suta sa kapulisan anaa sa Marawi ug area sa Cotabato matud pa nag gikan ang mga droga sa nahisgutang suspect kung asa ginadala sa syudad pinaagi sa pagsakay ug mga de pasaheroang sakyanan.(Dave Silagan)
