Davao City – Malaumon gihapon ang mga biktima sa linog sa Davao del Sur partikular na sa munisipalidad sa Magsaysay bisan og mingaw ang ilang pagselebrar sa Pasko karong tuiga.
Sa interbyu sa DXDC RMN Davao kang Anthony Allada, information officer sa Magsaysay sa maong probinsya, aduna gihapoy nahitabong panagtapok sa mga pamilya sa mga temporary shelters apan lahi ra sumala pa ang kasadya kung itandi sa wala pa ang kalamidad nga miigo kanila.
“Naa lang gihapoy mga panagtapok bahala’g naa ra sa tent. Dili man na mawala sa atoang tradisyon pero i-compare nimo sa milabay nga tuig, lahi ra gyud,” saysay ni Allada.
Saysay ni Allada nga walay nagselebrar sa Pasko sulod sa ilang panimalay tungod kay dili na gayud kini luwas kapuy-an ug dilikado sa mga aftershocks.
Bisan pa man, nagpabilin ang paglaum sa matag usa nga makaya ang mga pasulay ug makabangon sa sitwasyon sa mas daling panahon.
RadyoMaN Kirby Manzon
