Cuatro maga casa el yan uput mientras un Masjid parcialmente ya quema na incendio ya sosede na Galvez Drive, Tetuan enantes pasada alas 10 del aga.
Durante el cubrida del DXRZ- RMN Zamboanga ya sabe el fuego ya principia na casa del untal Suaib Muhin y yan calayat na otro maga sercanos casa incluhido na Masjid que serca lang na vicinidad.
Asegun con Muin Mohammad, unu del dueño del maga casa yan uput, nuevo lang sila junto consu familia ya caba almorsa pasada alas 10 del aga cuando ya oyi ya lang sila gritos del diila maga besinos hablando que tiene quema ta sosede.
Ya habla si Mohammad ya escutia le pa afuera, grande ya el fuego ta sale na casa di Muhin y ta lambe ya tamen na diila casa si porque ele junto consu familia nohay mas cosa ya puede hace mas que salta pa afuera y ya salva diila cada-y-cual vida.
Semehante tambien el cosa ya hace el otro maga dueño del casa que ya man umit aver para salva diila maga vida.
Hasta el Masjid na lugar ya quema tambien pero nohay mas gayot queda grande el destroso despues ya man ayudahan el maga vivientes del lugar y atiempo tambien ya llega ya el maga truck del bumbero.
Nohay casualidad durante el incidente mientras ta imbestiga pa el bumbero para sabe si cosa gayot el causa del quema y cuanto el destroso.
