Hayagan nga nagpakita sang iya nga suporta si South Cotabato Board Member Romulo Solivio sa ginpatigayon nga rally kahapon nga adlaw sa atubangan sang Provincial Capitol pasado alas 11 kahapon sang aga.
Ini matapos nga sa pihak nga nagapatigayon sila sang regular session naggwa ini kag naghatag sang mensahe agud nga ipabalo ang pagsuporta sini sa pagprotekta sang dunang manggad.
Nahibaluan nga ginpangunahan sang KALUHAMIN, SOCSKSARGENDS AGENDA kag DEFEND DAGUMA RANGE MOVEMENT ang nasambit nga rally kahapon nga adlaw.
Ang nasambit nga tikang sang grupo ang kabahin sang selebrasyon sang Earth day sang Abril 22.
Samtang ginasinggitan sang nasambit nga grupo nga untaton ang coal mining project sa Brgy Ned, Lake Sebu nga padayon suno pa nga ginaduso ni Governor Daisy Avance Fuentes tungod may environment code suno pa ang probinsya nga nagabawal sang open pit mining, pagpamatok sa posible suno pa pagpadayon sang Tampakan Project, palayason ang consunji kag ibasura ang oplan kapayapaan kag martial law.
Ginhatagan punto ni Board Member Solivio nga ang mga ginahimo sa subong sang gobyerno nga pagtugot sa mga dalagku kag langyaw nga pagmina, lapad nga plantasyon pagtukod sang coal plant kag iban pa ang kabangdanan sang climate change.
Ginpahayag pa ni Solivio sa ginpatigayon nga rally nga wala sang malain sa ginahimo nga protesta sang grupo tungod katungod man suno pa nila base sa balaud.
Samtang gintawag naman nga terorista sang isa ka raliyista si Governor Daisy Avance Fuentes tungod sa pagsuporta sa pagguba sang environment kag indi ang nagaprotekta nga mga environmentalist.
