Mukabat sa 1,000 kapin nga naglangkob sa mga mag-uuma, lumad ug grupo sa mga kabatan-onan sa probinsya sa Bukidnon ang nagpahigayon ug peace rally kagahapon.
Sa interview sa RMN Malaybalay ngadto kang Datu Armando Bravo ang founder ug executive director sa Lumad Mindanao Movement for Peace and Development, Inc. gibutyag niini nga ang mao nga rally agig pagsuporta usab sa State of the Nation Address kon SONA ni Pangulong DUterte.
Matud ni Bravo nga ang mao nga rally usab gihimo aron ipaabot ang ilang pagpasalamat ngadto sa pangulo sa mga programa nga gipatuman niini ilabina ngadto sa lumad.
Samtang sa gilauman, dili kontento ang New Peoples Army – North Central Mindanao Command kon NPA-NCMR sa nahimong SONA sa pangulo.
Sa interview sa RMN Malaybalay ngadto kang Ka Malem Mabini, ang tigpamaba sa NPA-NCMR gibutyag niini nga walay kalainan ang SONA kagahapon sa nakalabay nga mga sona sa president.
Matud ni Mabini nga wala man usab nahisguti sa pangulo ang kabahin sa pagpadayon sa hisgutanang pangkalinaw tali sa gobyerno ug sa CPP-NPA-NDF nga hingpit nang gi-uktaba.
