Davao City – Istriktong ipatuman sa mga mosque ang minimum public health standards sa pagsugod sa pag-obserba sa Ramadan karong adlawa (Abril 13, 2021).
Matud ni Davao City Mayor Sara Duterte-Carpio nga nagbaton na og koordinasyon ang Public Safety and Security Command Center (PSSCC) ngadto sa mga mosque aron matuman ang maong protocols batok Coronavirus Disease 2019 (COVID-19).
“With regard to sa atong pagsugod sa celebration, observance nato sa season sa Ramadan… Initially, ang atoang PSSCC duna na silay coordination sa mga mosque especially sa pag implement sa minimum public health standards,” saysay sa Alkalde.
Segun ni Mayor Sara nga anaa usab ang tahas sa mga team leader ug councilors sa mga barangay nga adunay mosque ang pagmonitor sa compliance sa nahisgutan sa pagsuot og face mask, social distancing ug frequent hand washing.
Giawhag usab ni Duterte-Carpio ang katawhan nga muduyog ug maghiusa sa pag-ampo alang sa kalinaw ug kalambuan sa syudad sa Davao ug ang pagkawala na sa COVID-19 sa dakbayan ug sa tibuok kalibutan.
RadyoMaN Kirby Manzon
