General Santos City—Midangop sa buhatan sa Police Station 4 ang usa ka ginang human gilugos matud pa kini sa iyang barkada didto sa may Barangay Mabuhay, Gensan, alas 10:00 ang takna sa gabie, kagahapong adlawa, June 17, 2019.
Biktima itago lang sa pangalan alias Mylene, 26, residenti sa Barangay Mabuhay, samtang ang suspek, itago lang sa pangalang alias Aldren, 27 anyos, residenti sa maong Barangay.
Nasayran nga nag-inum matud pa ang biktima ug ang suspek uban sa uban pa nilang mga barkada apan dihang nahurot na ang ilang imnunon, siya giuban sa suspek nga mupalit ug imnunon.
Apan didto kini gidala sa nasangpit sa ilang balay ug didto na giamong-amongan. Siya nahadlok nga mangayog tabang gumikan siya gibaharan sa suspetsado.
Hugtanon usab nga gihimakak ni Aldren ang aligasyon batok kaniya. Sumala pa nga wala niya gilugos ang maong babaye gumikan ila mang sinabutan ang tanan.
Nasayran nga nadakpan ang suspek atol sa gihimong hot pursuit operation sa kapulisan.
