BAGO CITY, NEGROS OCCIDENTAL – (4th Update) Ginhilabtan gid man ang kinatawo sang 5 anyos nga bata nga babayi nga nasapwan patay kahapon sa Bago City.
Base sa post mortem result, gin-confirm sang medico legal officer sang Bago City nga si Dr. Orlando George Gonzaga nga apesar wala sang penetration nga natabo, may insertion naman gamit ang matig-a nga bagay bangud sang samad nga nakita diri.
Nakita man sa resulta nga ang bata ang ginkuga nga amo posible ang isa sa rason sang iya kamatayon.
Samtang, sa bahin naman sang tatlo ka mga ginakabig karon person of interest nga sanday Job Villanueva, 60 anyos, anak niya nga si Glenn, 40 anyos kag Zaldy Caspe, tanan pumuluyo sang amo ngar lugar, gin-inquest na ang kaso nga rape with homicide batuk sa ila.
Sa interview sang DYHB, hugot nga ginapanginwala sang isa sa mga suspek nga si Zaldy nga may kahilabtanan siya sa krimen.
Suno sa iya nga ang pala nga nakita sang mga tawo nga ginabitbit niya ang gin-gamit niya sa pagkutkot sa duta agud didto magpa-muhin.
Ginpahayag naman sang duha pa sa mga suspek, ang mag-amay nga Job Villanueva, 60 anyos kag Glenn, 40 anyos nga indi matuod ang akusasyon batuk sa ila bangud nga may obra ini sila sa talamnan kag wala sa ila balay sang posible natabo ang krimen.
Lunsay ginatum-ok sang mag-amay si Zaldy nga amo ang naghimulos kag nagpatay sa bata.
Suno sa utod sang biktima nga si April, 30 anyos, nakita ang isa ka pares sang tsinelas sang biktima lakip na ang 15 pesos nga kwarta sa idalum mismo sang katre sang mga suspek.
Sa karon detained na ang tatlo ka mga suspek sa custodial facility sang Bago City PNP.
