RATE SA PAGGAMIT SA SURIGAO CITY SLAUGHTERHOUSE TAGTAKDA PATAS-AN
Plano sa gobyerno sa siyudad na patas-an an rate sa mga mogamit nan pasilidad suyod sa City Slaughterhouse sa Brgy. Poctoy inin siyudad.
Namahayag si City Councilor Kent Yuipco, isa ka Committee Hearing an ila tagpatawag kaganina para sa pagpresentar sa amo na plano sa pagpataas nan rate na moabot sa kapin 50 porsiyento. Tagtudlo na pipila ka tuig na an milabay sa pinakaulahi na pagpataas sa rate ugsa na sa ija tan-aw makatarunganon an pagpa-usbaw. Plano na patas-an an rate para sa mga magpa-ihaw nan karne sa baboy, baka ug carabao. Ugani sa tigom, tagpatawag an City Vetenirarian ug incharge sa Slaughterhouse na si Dr. Allan Quines lakip an mga opisyales nan Meat Section sa Surigao City Public Market sa pagpanguna nan Presidente na si Brgy. Kagawad Susan Galinea.
Hinoon dugang pa ni Councilor Yuipco, dili pa penal an mga natuki labi na kay tagtakda na mohimo pa nan counter-offer an habig sa mga meat vendors ugsa na plano pa sa mga sakop sa Sangguniang Panlungsod na mopatawag pa nan laing panagtigom sunod na mga adlaw.
