Gipresentar ni PNP Caraga Reg’l Director P/BGen. Joselito Esquivel, Jr ang kalampusan sa kwerpo sa kapulisan sa nakalabyang tuig 2019, atol sa gihimung 1st Command Conference ug tradisyunal nga New Year’s Call kagahapon sa Camp Rafael Rodriguez, Brgy. Libertad ning syudad sa Butuan.
Unang gitumbok nga labing dakung kalampusan sa kapulisan mao ang pagpahigayon sa malinawon nga 2019 midterm elections ug pagkasikop ni Ambrosio Montañez, Jr sa kasong murder kinsa number 2 most wanted person sa rehiyon.
Pasado usab ang PRO 13 sa gihimung screening sa national headquarters sa Performance Level Monitoring System for Strategy Partners; ang paghatag ug ayuda sa pamilya sa mga sakop sa rebelding New Peoples’ Army (NPA) nga napatay sa engkwentro tali sa tropa sa goberno.
Kalabot sa kampanya kontra illegal nga droga, mokabat sa 585 ka mga operasyon ang gikasa nga miresulta sa pagka-aresto sa 597 ka mga drug personalities ug pagkompiska sa P788,786,824.64 nga droga.
Positibo usab ang resulta sa ilang operasyon batok sa illegal logging, illegal gambling ug illegal fishing.
Samtang gibutyag sa opisyal ang signipikanting pag-ubos sa crime rate ning rehiyon ngadto sa 27.12%.
Gisaad ni P/BGen. Esquivel nga mas palamboon pa ang serbisyo sa kapulisan karong tuig 2020 gamit ang mga dugang logistical assets nga ilang nadawat gikan sa national headquarters nga naglangkob sa lima ka Toyota Hilux Pick-up Truck high-end Police Patrol Vehicles, 26 ka CCTV, 150 ka mga computers, 5.56mm magazines ug bandoliers ug mga armas isip kabahin sa capability enhancement sa kwerpo sa kapulisan (with report archer capadeso/ivy falcone).
