Hugtanong ipatuman ugma dayon, Hulyo 22 ang pag-imposar og balik sa Regional Border Control Point o ang boundary tali sa Misamis Oriental o Region 10 ug Caraga Region o Region 13 aron mapugngan ang pagkuyanap sa bag-ong gikalisangan nga Delta variant sa COVID-19.
Kini ang nauyunan sa mga membro sa Caraga Regional Task Force for COVID-19 One Caraga Shield (RTF-COCS) teleconference karong adlawa, Hulyo 21 nga gipangunahan ni Gov. Dale B. Corvera sa Agusan del Norte, ang chairperson sa RTF-COCS ug sa Caraga Regional Development Council.
Una ng gipahibalo ni Gob. Corvera ngadto sa mga membro nga adunay gipagawas nga Executive Order No.34 ang probinsya sa Agusan del Norte nga manginahanglan og Health Certificate o Exit Pass ang tanang travelers ug passengers nga gikan sa Region 10 nga mosulod sa probinsya alang ma-kontrola ug mapugngan ang pagsulod sa maong variant sa probinsya.
Apan miapela si Gov. Santiago Cane Jr. nga dili lamang ang Agusan del Norte ang na-alarma sa maong variant apan ang tibuok Caraga Region. Pasabot ni Gov. Cane nga kung masudlan man gani ang Agusan del Norte posible dali na usab ma sudlan ang kasikbit nga probinsya niini. Hinungdan nga mi-sugyot ang gobernador nga striktong ibalik pag-imposar ug pag-implementar ang usa ka regional border checkpoint niini.
Miuyon dayon si Gov. Corvera apil ang tanang membro niini apan buot sa gobernador nga kinahanglan himay-himayon ang mga masabotan nga mga rekisitos niini aron dili mabug-atan sa mga galastoson ang katawhan sa ilang pagkuha og mga rekisitos.
Nasabotan sa maong meeting nga hugtanong did-an ang tanang Caraganons pag suroy-suroy sa mga lugar nga adunay nakaplagan nga Delta variant ug nagpailawom sa Enhance Community Quarantine (ECQ) except sa mga essential nga lakaw ug adunay mga emerhensiya.
Alang sa mga non-Caraganons, pasahero ug byahero nga buot mosulod sa rehiyon ilabina sa mga lugar nga adunay nailhan nga adunay Delta variant lakip na ang gikan sa Region 10 partikular sa Cagayan De Oro City ug Gingoog City, adisir makasulod sa rehiyon kinahanglan i-presenta ang bisan unsa nga mga rekisitos nga mao ang mga mosunod:
a)NEGATIVE RT-PCR test; b) Vaccination Card whether 1st o 2nd dose as long as 2 week period has elapse from the date last vaccination; c) For APOR – ID ug Travel Authority; d) for Frontline medical services -ID; e) Application nga S Pass ug Stay safe pass [dinhi makita ang mga rekisitos nga kinahanglan matag LGU]; f) Delivery receipt o Mayor’s permit alang sa mga transportasyon nga adunay dala nga essential goods services; ug lakip na sa pagdala og ID.
Alang usab sa mga lumolupyo sa Magsaysay, ID nga adunay nakabutang nga address niini ang mamahimong ipakita. Gitagaan kini sila og lugway sa gobernador tungod kay nakita ni Gob. Corvera nga duol raman kini sa lungsod sa Carmen nga didto sila mag merkado.
Alang sa galastuhan sa regional border, boluntaryong mibungat ang matag probinsyal ug city LGU nga motampo og tag Php50,000.
[Sinulat ni Karen Decamotan]
