Magpadayon ang recovery ug rehabilitation works sa Marawi City base sa kung unsay gi-plano.
Kini bisan paman sa pagtangtang ni Presidente Rodrigo Duterte kang Housing Secretary General Falconi Millar, Head Secretariat sa Task Force Bangon Marawi kon TFBM.
Kini ang nasayran sa dxCC-RMN Cagayan de Oro gikan sa dxIC-RMN Iligan.
Matud pa ni Marawi City Mayor Majul Gandamra sa usa ka pamahayag nga gipadala sa DXIC RMN Iligan, pinaagi sa text message, ang pag-ilis, pag-terminate o kaha pag-resign sa usa ka empleyado, kinsa directly o kaha indirectly nga nagtrabaho sa TFBM, dili maka-apekto o kaha makapa-undang sa operasyon sa gobyerno aron ipatukod og balik ang 250-hektarya sa Marawi nga maoy dakung na-apektuhan sa lima ka bulan nga giyera niadtong nakalabay’ng tuig.
Dugang ni Gandamra nga ang mga ‘public servants’ nagtrabaho ‘at the pleasure of the appointing authority’ ug sa katawhan, ‘in general’.
Apan mas importante usab nga ma-imbestigahan ang mga isyu kabahin sa mga tulubagon sa mga public officials ug mga empleyado ilabina kay ang public office usa ka’ public trust’.
Niadtong nakalabay’ng semana, gipalagpot ni Presidente Duterte si Millar tungod sa mga alegasyong korupsiyon sa Housing and Urban Development Coordinating Council.
Gibutyag ni Millar nga mi-resign siya ug wala gitangtang.
Sa usa ka pamahayag, gibutyag sa TFBM nga gikasubo niini ang nahitabo apan dili mahunong ang pagtrabaho sa Marawi rehabilitation bisan paman niini.
