Rehabilitasyon ug pagpalambo sa Bukidnon Provincial Zoo gipahigayon sa panahon sa pandemya

29

GIPAHIGAYON sa Bukidnon Provincial Zoo ang rehabilitasyon ug pagpalambo sa pasilidad samtang anaa sa panahon sa pandemya aron mas nindot ug hapsay ang pagpadagan niini, sama sa pagmontar ug patubig gikan sa water source, CCTV cameras ug paging system, pagbutang ug mga perimeter lights ug pagbutang ug water waste treatment facility alang sa drainage system.

Sa data gikan sa Bukidnon Provincial Zoo, adunay 104 ka mga binuhing mga hayop ang anaa ubos sa pag-alima sa Provincial Zoo personnel sa pagpanguna ni Dra. Carmen S. Tangara, Provincial Zoo Curator diin 37 niini ang endemic animals sama sa unggoy, buaya, baksan, mga banog ug mga serpent eagle nga makita ra sa atong nasod samtang laing 20 ka mga exotic animals nga makita gikan sa gawas sa nasud sama sa macau birds, lion, tiger, ug daghan pang uban.


Sa kasamtangan, nagpabiling sarado ang Bukidnon Provincial Zoo sa Kaamulan Park, Capitol Compound, Malaybalay City, Bukidnon sa tinguha nga malikay ang mga mobisita ug dili mataptan sa COVID-19. Matud ni Dra. Tangara nga sa pagkakaron, gahulat pa kini ug advice gikan kang Gov. Jose Ma. R. Zubiri, Jr. basi usab sa recommendation sa IATF subay sa ilang guidelines kung kanus-a subling buksan ang Provincial Zoo.

Basi sa 2020 Accomplishment Report, natala sa maong opisina ang 43,918 ka ihap sa katawhan nga nakabisita sa Provincial Zoo sugod Enero hangtud sa tunga-tungang bahin sa Marso ug naundang kini hangtud sa kasamtangan gumikan sa pandemya sa COVID-19.

Ang Bukidnon Provincial Zoo gitukod ug gipondohan sa kinatibuk-ang kantidad ₱28,657,899.42 alang sa Construction of zoo cages ug uban pang facilities/amenities ug gibuksan sa Pangagamhanang Probinsyal niadtong Marso 29, 2019 sa tuyo nga kahatagan ug higayon ang taga-Bukidnon nga makalantaw sa mga talagsaong hayop nga didto lamang makita sa Manila Zoo.

Facebook Comments