Gikabutyag nga kumpleto na ang mga rekisitos aron ipatuman na ang demolasyon sa mga balay nga iligal nga gitukod diha sa Purok 11, Baloy, Tablon ning syudad. Kung diin nadawat na ang Writ of Demolition Notice sa mga informal settlers dili pa lamang dugay. Kini maoy gibutyag ni Estela Colonia, Presidenti sa ilang asosasyon sa maong lugar.
Matud pa ni Colonia, adlaw’ng Martes sa sunod semana June 21, 2022 ang nakalatid nga pagpatuman sa maong notice nga i-demolish ang maong lugar. Nasayran nga ang maong notice ang gipirmahan mismo ni Sheriff IV Ma. Teresita Quiblat-Inso kung diin naka-address kini sa tanang concerned officials sa local ug national nga buhatan sa goberno sa Cagayan de Oro ug Misamis Oriental.
Tungod ni-ini, ang ubang mga informal settlers ang boluntaryo na nga miguba ug hakot sa ilang mapuslan pa nga mga gamit. Samtang ang uban padayon pa gihapong nagmagahi mopahawa sa lugar kung diin gikabutyag nga gipanag-iyahan kini sa pribadong indibidwal.
Sa laing bahin, nagpatawag og meeting karong hapon kalabot sa ipatumang demolition nga gipangulohan ni Mr. Roberto Villaluz, ang gi-ingong representante sa Administrator’s Office sa City Hall.
Ang nasangpit nga meeting ang gitambongan ni Sheriff Ma. Teresita Quiblat-Inso, Representante sa COCPO for Operations PCol. Teves, Assistant Chief sa Oro Rescue Menard Torres, representante sa Brgy. Tablon ug uban pang mga personahe.
“Close door” ang maong meeting sanglit wala gitugtan ang media representatives nga maka observe ug makapangutana sa public concern. Matud pa ni Mr. Villaluz nga naa pa silay vital information nga pagahisgotan nga dili pwedi ipagawas sa publiko. Samtang limitado usab ang tubag ni Sheriff Quiblat-Inso ug wala na kini nakahatag pa og mga impormasyon kalabot sa maong notice sanglit mi-ingon kini nga naa pay himoong meeting karong Lunes una pa man ipatuman ang Writ of Demolition pagka-Martes.
