Andam imbestigahan sa Department of Education o Deped Cagayan de Oro City ang reklamo sa pamilya sa usa ka estudyante nga naghikog patay sa flagpole sa Tumpagon National High School niadtong Lunes sa hapon.
Sa interview ni RadyoMaN Zaldy Ocon atol sa programang Straight to the Point – Kuskos Batikos karong buntag gipa-submit sa Division Office ni Dr. Jonathan Dela Peña, Schools Division Superintendent ang reklamo gikan sa pamilya.
Matud ni Dr. Dela Peña, kini aron ilang maaksiyunan tungod kay wala pa usab silay nadawat nga reklamo gikan sa pamilya sa biktima.
Nasayran nga buot sa pamilya sa biktima nga ma-imbestigahan ang maestra nga si Ma’am Jane Bacalso Galleon nga giakusahang maoy hinungdan sa pagpakamatay sa estudyante nga si Carleo Kenney Joy Mangconsay, 22 anyos, usa ka grade 10 student ug Supreme Student Government President sa nasangpit nga tunghaan.
