Reklamo sang mga OFWs nga gindala sa healing center ginsabat sang opisyal sa probinsya

17

Ginsabat sang opisyal sang Negros Occidental ang reklamo sang mga Negrense OFW nga nag-abot sa Bredco Port kahapon sang aga sa diin gin-deretso sila sa Healing Center sa EB Magalona kag indi sa hotel.

Sa exclusive interview sang DYHB kay Rene Yodi, isa sa 45 ka Negrense OFW nga nag-abot kahapon, upod sa 39 ka mga Bacolodnon returning OFWs, ila ginkwestyon ang tikang sang provincial government nga gin-deretso sila sa EB Magalona agud didto pa ipadalom sa swab tests antis sayluhon sa hotel.


Ini ang baliskad naman sa tikang sang city government sang Bacolod sa diin ang 39 ka returning OFWs ang gin-deretso sa isa ka hotel.
Suno kay Yodi, paghalin nila sa Manila, nagpasalig ang Overseas Workers and Welfare Administration (OWWA) nga ideretso sila sa hotel magpauli sa probinsiya.

Angut sini, nagpaathag si Dr. Zeaphard Gerhart Caelian, head sang Provincial Disaster Management Program Division (PDMPD) kag in-charge sang transportation sang mga returning OFWs, nga ang pagdala sa ila sa EB Magalona para didto ipaidalom sa swab tests, amo ang ginasunod nga proseso sang Provincial Health Office (PHO).

Ini ang kasunod sang eksperyensiya sang PHO, nga sa una nga duha ka batch sang returning OFWs nga gin-deretso sa Go Hotels sa Bacolod kag diri ginkuhaan sang swab tests kag sang ulihi may nag-positibo sa COvid-19.

Paathag pa ni Caelian, indi na luyag sang probinsiya nga ini ang masulit bangud dugang nga huol nga kuhaon sa hotel ang nag-positibo nga OFW kag dal-on sa Healing Center, gani agud nga makasigurado, luyag nila nga luwas na sa virus ang mga OFWs antis sila dal-on sa ginpreparar nga hotel sang OWWA.

Samtang ginpasalig ni Dr. Caelian nga ipalab-ot niya sa natungdan nga mga opisyal ang dugang nga reklamo ni Yodi nga indi maayo nga sitwasyon sa housing units sa Healing Center.




[image: image.png]

Facebook Comments