MOISES PADILLA – May clearance halin sa Philippine National Police, PNP Regional Office 6 ang ginhimo nga pag-relieve kay Moises Padilla PNP chief, Police C/Insp. Allan Reloj.
Ini ang ginklaro ni Negros Occidental Police Provincial Office, NOCPO Provincial Director, Police S/Supt. Rodolfo Castil.
Suno kay Castil, ang desisyon sang provincial police office nga pag-relieve kay Reloj ang may pahanugot sa PNP Regional Office 6.
Nahibaluan nga effective kahapon, relieved na si Reloj sa Moises Padilla kag gilayon nga ginsaylo sa Pulupandan PNP.
Samtang ang hepe naman sang Pulupandan nga si S/Insp. Alfred de leon amo ang ginbulos kay Reloj sa pwesto effective man kahapon nga adlaw.
Ginpahayag naman ni Task Force Kasanag Commander John Chiong nga ginalauman na nila ang pagrelieve kay Reloj matapos nga ila ginsulatan si PNP Chief Director General Ronald dela Rosa.
Ini angot naman sa indi insakto nga sistema sang pagcheck-point kay Vice-Mayor Ella Garcia Yulo kag iya bana nga Felix Mathias Yulo III sang Disyembre 19, 2017.
Ini para wala sang hokus pokus sa imbestigasyon nga himuon sa ulihi kay Reloj samtang ginahanda ang nagakaigo nga kaso halin sa pamilya Garcia.
Ginklaro ni Castil, nga reshuffling ang natabo bangod overstaying na si De Leon sa Pulupandan kag wala labot ini sa insedente sa Moises Padilla. /dyHB BACOLOD
