Davao City – Gipahimangnuan sa City Health Office kun CHO ang mga residente sa Purok 15 Bago Aplaya, Davao City nga mag-igmat sa mga posibleng sakit nga makuha sama sa Dengue ug Leptospirosis diha sa walay paghubas sa tubig baha sa lugar.
Sa interbyu sa RMN Davao kang CHO Tropical Diseases Prevention and Control Division Pest Control Worker II Melodina Babante, gilaraw nila nga magpahigayon og prophylaxis sa mga residente kontra sa leptospirosis.
Matud ni Babante nga muhimo usab sila’g mga aksyon sa partikular nga lugar aron mamatay ang mga lamok nga posibleng magdala’g dengue.
Aron malikayan usab ang diarrhea ilabina kung dili luwas ang tubig mainom tambag ni Babante sa katawhan nga mas labing maayo nga pabukalan ang tubig usa kini imnon kung dili makapalit og distilled water.
Ang hangyo karon sa CHO nga suportaan sila mga residente sa mamahimong aksyon aron walay mataptan o malikayan ang mga sakit.
Plano usab nga tagbuon sa CHO ang barangay kapitan sa maong lugar sa mga pagahimuon pang lakang subay sa maong suliran.
RadyoMaN Aimee Guinita
