Isa ka resolusyon ang ginpasar sang Provincial Peace and Order Council sang South Cotabato sa ginpatigayon nga joint meeting sang tinalikdan nga adlaw nga nagahangkat sa taglikom sang Department of Environment and Natural Resources nga aksyunan na ang problema sa tatlo ka mga sitio sang Barangay Ned, Lake Sebu nga indi na sakupon sang IFMA sang Consunji ang lupa sang mga lumad sa nasambit nga area.
Ini matapos nga indi na magsugot pa ang mga CADT owners nga sakupon pa sang Consunji ang ila nga area.
Samtang suno kay South Cotabato Governor Daisy Avance Fuentes sa ulihi nga pagpakig-istorya sang grupo ni Sister Susan Bolanio sang Hesed Foundation upod na ang apat ka mga alkalde kag Kongresista sang Sultan Kudarat ang nagsugtanay na nga i-separar ang CADT sang tatlo ka mga sitio sa IFMA sang Consunji.
Apang suno sa gobernadora ipalab-ot sa gihapon nila ang naaprobahan nga resolusyon sa DENR Secretary agud mabatian man ang boses sang probinsya nga nagahingyo nga resolberon na ang problema sang mga lumad sa lugar, matapos nga ini ang nangin tunaan sang engkwentro sa tunga sang mga katapo sang militar kag mga lumad nga supporters sang NPA.
