Resolusyon pagpagawas og moratorium sa expansion sa mga dagkong kompanya sa pinya ug saging sa siyudad sa Malaybalay, giduso sa konseho

Giduso karon sa konseho sa siyudad sa Malaybalay ang resolusyon kabahin sa pagpagawas og Moratorium sa expansion sa mga dagkong kompanya sa saging ug pinya ngadto sa mga kabarangayan ning siyudad.

Atol sa regular session sa Sangguniang Panglungsod (SP)-Malaybalay adtong Martes, Enero 3,2023, giduso ni Konsehal Manoy Legaspi ang usa ka resolusyon nga mag reimpose sa resolution no. 2012 0787, kon ang Resolution on Urgently Imposing Moratorium on expansion of large scale pineapple and banana plantations.

Kini aron sumala pa nga mahatagan og panahon sa pag-imbentoryo ang mga otoridad sa dili pa ipabalik ang expansion sa mga kompanya sa saging ug pinya nga nahimutang sa nagkadaiyang barangay ning siyudad.

Target usa pa nga magpahigayon og committee hearing sa dili pa hingpit nga maaprubahan ang maong ginadusong resolusyon aron nga mahisgutan ang mga gikinahanglan pagpasaka niini.

Sa karon, giadoptar na sa konseho ang maong resolusyon ug ginahulat nalang ang resulta sa committee hearing sa Committee on Environment and Natural Resources nga gihuptan ni Konsehal Manoy Legaspi.