Roxas City, Capiz – Restricted subong ang pulis nga si Police Corporal Almar Quiachon matapos ang shooting incident nga nagresulta sa kamatayon sang 29-anyos nga si Mery Cris Dellava nga nasalabat lamang sang bala sang magluntad ang komosyon sa binaylehan sa Brgy Putian, Cuartero, Capiz.
Ginpahayag ni CPPO Provincial Director Police Colonel Canilo Fuentes nga nakalab-ot na sa iya atensyon ang amo nga insidente kun sa diin insigida nagpatigayon man ini sang separado nga imbestigasyon.
Nagrequest naman ini sang autopsy halin kay *Dr*. *Joe Martin Fuentes* nga amu ang medico-legal officer sang Capiz Crime Laboratory para matumod kun sa diin ang pilas sang biktima kag kay sin-o nga pusil ang nakapilas diri.
Samtang ang caliber .45 pistol sang persona nga si Jovil Onato kag ang .9 mm caliber pistol nga ginapanag-iyahan ni Police Corporal Almar Quiachon ang gindala na sa crime laboratory para sa nagakaigo nga ballistic examination.
Kadungan sini, ginpasiguro naman ni Fuentes nga wala sang matabo nga “white wash” sa kaso nga ginadalahigan sang nasambitan nga police officer.
Sa madumdoman nga base sa inisyal nga imbestigasyon sang Cuartero PNP, may yara sang binayle sa nasambit nga barangay sang nagluntad ang komosyon kun sa diin imbolbado ang grupo ni Jovel Onato sang Barangay Mahunod-hunod, Cuartero.
Nahibaloan nga wala makalupok ang armas ni Onato sang tuyo nga luthangon si Quiachon kabangdanan nga nga si ang naunahan.
Apang dimalas nga nasalabat sang bala ang biktima nga si Dellava nga yara sa sulod sang ila panimalay kag nagapadede sa iya lapsag.
