“Meaningless ang survey nga gihimo sa Xavier University”.
Kini ang linyang gipagawas ni kandidato pagka-mayor Pompee La Viña human migawas ang survey diin migula nga ubos ang rating nga iyang nakuha.
Matud ni La Viña, April 4 pa dihang nagsugod ang survey ug nianang panahona wala pay nakaila kaniya.
“Kung 100 meter race pa na, mao pay pagbuto sa pusil” of course mauna gyud si Moreno tungod kay mas una pa siyang nailhan kaysa akoa” pahayag ni La Viña.
Gitawag pa niining Ancient history ang maong survey tungod kay dugay na kining gipahigayon apan bag-ohay pa lang gipagawas ang resulta nga naabtan sa tulo ka semana.
Dugang pahayag niini nga kung tan-awon ang tanang survey, mas paspas ang iyang pagsaka dungan sa paspas nga pagkanaog sa rate ni Mayor Oscar Moreno.
“Akong tan-aw, ahead na me sa district 2 ug gaapas sa district 1 kay lage balwarte man kana ni Klarex Uy”, dugang pahayag ni La Viña.
Basi sa latest survey sa kampo ni La Vina, misaka ang rate niini sa 16 porsyento o 8 out of 10 ilabina sa mga tawong gapamaligya sa merkado sa Cogon ug Carmen.
Gihagit usab niini ang XU nga mahimong transparent sa pagpahigayon sa survey ug daling ipagawas ang resulta.
Samtang, ang maong resulta nakapa-aghat kang La Viña tungod kay nakita niining grabe ang gipakitang suporta sa katawhan kaniya ug dili na kinahanglang manghakot pa aron ingnon nga daghan og tawo panahon nga magpahigayon sila og rally.
