Davao City- Nangayo og pagsabot si Davao City Mayor Inday Sara Duterte-Carpio ngadto sa mga tagtungod nga namatyan atol sa nahitabong sunog sa NCCC Mall of Davao tungod gikinahanglan pa og taas nga panahon una nila makauban ang patayng lawas sa ilang mga minahal sa kinabuhi.
Sa usa ka ambush interview, miingon si Mayor Duterte nga nakigistorya kini sa mga tagtungod sa naapil sa maong trahedya ug miingon nga lugwayan pa ang ilang pasensya sa pagpaabot ug hatagan og higayon ang mga awtoridad nga ma retrieve ang mga patayng lawas sulod sa mall aron matugotan na kini sa pag ila sa ilang mga paryente.
Hinuon gimandoan na ni Mayor Sara ang SOCO nga paspasan ang pagproseso niini aron sa dili madugay makauban na sa mga pamilya ang ilang mga kabanay.
Nasayran nga adunay ipahigayon nga inbestigasyon ang Bureau of Fire Protection ug National Bureau of Investigation gawas sa pinasahing inbestigasyon sa mga tagtungod sa biktima aron masayran ang kamatuoran sa maong trahedya.
“Depending on the result of the 3 investigations, we will file the appropriate charges if they (NCCC Mall of Davao) are warranted doon sa result ng investigations,” segun ni Mayor Inday.
Alayon niini, makig meet usab siya ugmang adlawa sa management sa NCCC ug SSI aron mahisgotan ang mga assistance nga itunol ngadto sa mga pamilya.
Matod kang Mayor Duterte, ang City Government of Davao ang mutubag sa hospital bills, funeral ug burial sa 37 ka mga tawo nga namatay tungod sa sunog.
Sa interview sa media ganina atol sa special session sa konseho kinsa gitambongan usab sa inahan sa dakbayan, miingon kini nga ang pondo mag gikan sa City Mayor’s Office ug sa Crisis Intervention Fund.
RadyoMaN Abi Bibera
