EB MAGALONA, NEGROS OCCIDENTAL – Kapin isa ka libo ka mga mangrove ukon bakhaw kag masobra 600 ka mga fruit bearing trees ang ginpangtanum sa ginpatigayon nga Reverde Ako 2018, tree planting activity sang DYHB, RMN Foundation kag iFM 94.3 kaina sang aga sa banwa sang EB Magalona.
Magkadungan nga ginpatigayon ang aktibidad kon diin ini ang gintunga sa duha ka bahin, isa sa coastal kag isa sa upland.
Ang coastal activity ginpatigayon sa Brgy. Tuburan, EB Magalona kon diin masobra sa sa isa ka libo ka mga bakhaw ang natigayon nga matanum.
Ini ang ginsakdag kag ginpangunahan mismo ni EB Magalona Mayor Marvin Malacon, Environment Officer Jojo Vargas kag sang mga representante sang DepEd pinaagi sa Tuburan Elementary School kag High School, Brgy. Nanca Elementary School, DENR, mga BHW, Barangay Tanod, SK Federation kag sang E.B Magalona Municipal Police Station.
Samtang ang sa upland naman ginpatigayon sa Brgy. Nanca, EB Magalona kon diin masobra sa 600 ka mga kahoy nga nagapamunga sang prutas kaangay sang babana, rambutan, indian mango, santol, atis, langka kag madamo nga iban pa ang natigayon nga matanum.
Kabahin ini sang pagdul-ong sang serbisyo publiko sang RMN partikular ang pag-amlig sang dunang manggad sa pagpati nga ang padayon nga pagtanum sang kakahuyan kag bakhaw ang magahatag sang daku nga benepisyo sa palibot./dyHB BACOLOD
