MOISES PADILLA – Nagtanyag sang dugang nga isa ka milyon ka pesos ang local party nga Love Negros bilang reward sa sin-o man nga makatudlo agud maaresto ang mga suspek nga nagtiro patay sa utod kag hinablos sang vice mayor sang banwa sang Moises Padilla sang nagligad nga Huwebes.
Bangud sini, nahimo na karon nga 2 million pesos ang reward money para sa sin-o man nga makahatag impormasyon sa mga suspek nga nagpatay sa utod ni Moises Padilla Vice Mayor Ella Garcia Yulo nga si Mark Garcia kag sa hinablos sini nga si Coun. Michael Garcia.
Madumduman nga pila ka oras matapos gin-ambush ang mga suspek, gilayon nga nagpadulong sa banwa sang Moises Padilla si Gov. Alfredo Maranon Jr. kag nagpakigsugilanon sa bise alkalde kag nagtanyag sang 1 million pesos nga reward.
Angut sini, ginpahayag ni Love Negros leader, Cong. Albee Benitez nga ensakto ang tikang nga ipaidalum sa Comelec control ang banwa bangud indi na ensakto ang serye sang mga pagpamatay nga nagakatabo sa Moises Padilla.
Samtang, Gin cremate na sini nga adlaw ang bangkay sang utod ni Moises Padilla Vice Mayor nga si Ella Garcia-Yulo nga gintiro sang nagligad nga Huwebes sa amo nga banwa.
Ang cremation sang bangkay ni Mark Garcia ang ginpatigayon sini gid lamang nga hapon sa crematorium sang Rolling Hills Memorial Park, Bacolod City.
Madumduman nga si Mark upod ang iya hinablos nga si Moises Padilla Coun. Michael Garcia ang gintiro kag napatay sadtong Huwebes, las 11 sang aga sa Brgy. Inolingan sang amo nga banwa.
