Davao City – Wala na madala sa hospital ug gideklarang patay na sa mirespondeng Central 911 Medic Team ang driver human napasok sa truck ang iyang gimanehong motorsiklo sa Sitio Lambo, Barangay Indangan, Distrito sa Buhangin, syudad sa Davao.
Ang biktima giilang si Nathaniel Torifiel, 21 anyos, nagpuyo sa Sampaguita St., Buhangin, dakbayan sa Davao.
Sa imbestigasyon ni Duty Traffic Investigator P/MSgt. Ramel Boyano Buhangin Police Station, gikan sa North Bound Area ang biktima ug paingon sa Indangan proper apan pag-abot sa maong lugar kalit na lamang mideretso ang motor sa biktima alas 9:00 sa gabii sa ilawom sa likod nga bahin sa truck nga gipanag-iyahan sa DOVV Sales ug gimaneho ni Rico Adonis, nagpuyo sa Tibungco ning syudad.
Tungod sa kakusog sa impact, nakahiagom og daghang bun-og sa kalawasan si Torifiel nga miresulta sa iyang kamatayon.
Nasayran nga atol sa nasangpit nga aksidente wala niadtong tungora ang driver sa truck, maong gidala na lamang ang patay’ng lawas ni Torifiel sa punerarya.
Kasong Reckless Imprudence Resulting to Homicide ang kasong atubangon ni Adonis.
RadyoMaN Joel Viray
