Roxas City, Capiz – Ginbawian sang kabuhi samtang ginabulong sa ospital ang isa ka barangay kagawad matapos ginluthang sang riding-in-tandem sa Barangay Bago, Roxas City mga 3:20 kahapon sang hapon. Ginkilala ang biktima kay kagawad Winnie Salazar, 53 anyos, sang Barangay Agdahon, Cuartero, Capiz. Nag-angkon sang mga igo sang bala sa lawas ang biktima nga amo ang gintunaan sang iya kamatayon. Narekober sa ginluntaran sang insidente ang apat ka mga basiyo sang calibre .45 nga armasluthang.
Sa interview sang DYV RMN Roxas kay Police Senior Inspector Erica Apelyido, Deputy Chief of Police sang Roxas City PNP, nagasakay ang biktima sa iya motorsiklo sang ginalagas ini sang duha ka mga suspek sakay man sa ila motorsiklo. Sang naka-abot na sa nasambit nga duog ginluthang sang mga suspek ang biktima sang maka-apat ka beses gamit ang caliber .45 nga armasluthang kag madasig ang mga ini nga nagpalagyo.
Natigayon pa nga napapundo ni Salazar ang iya motorsiklo antes ini gindala sa ospital. Nagapauli na kuntani ang biktima kun sa diin ginsubay sini ang dalan humalin sa city proper, padulong sa Barangay Bago. Nagtambong pa sa hearing sa Roxas City Hall of Justice sa kaso may kaangtanan sa nagluntad nga pagpangluthang sa banwa sang Cuartero nga ginkadalahigan sang biktima, antes nagluntad ang insidente.
Nahibaluan nga antes nabugto ang ginhawa ni Salazar, gintuad sini nga isa ka ‘certain’ Toto Degara ang yara sa likod sang pagluthang sa iya. Ginpahayag dugang ni Police Senior Inspector Erica Apelyido nga isa sa mga ginasunod nila nga angulo sa pagpatay sa biktima amo ang ginakadalahigan sini nga kaso sa banwa sang Cuartero. Sa karon, nagapadayon pa ang madalom nga imbestigasyon sang kapulisan kag ginalauman nga mapasaka na ang kaso nga murder batuk sa mga suspek.
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
