Davao City – Nasubo si Davao City 1st District Councilor Joanne Bonguyan-Quilos sa taho nga mikabat og 130-mil ka batan-on ug kababainhan ang nakasinati sa lahi-lahi nga matang sa bullying.
Kumbinsido si Councilor Quilos nga naka-ambag sa bullying ang gihambing nga problema sama sa sayo nga pagmabdos sa mga batan-ong kababainhan, paglambigit sa bisyo ug uban pang bug-at nga hinungdan.
Matud ni Quilos kinsa Chairman sa Committee on Technology sa konseho nga crucial ang hisgutanang suliran sa adolescent stage ilabi na daghan ang wala makasabot kung unsa ang bullying.
Nunot matud pa kini sa kakulangon sa pagpakusog sa kampanya sa pag-edukar sa katungod ug unsaon pagbuntog sa presyur nga gi-atubang sa mga batan-on karon gumikan sa bullying ug abuso.
Maayo na lang kay gitutokan ni Mayor Inday Sara Duterte-Carpio ang pagtabang sa mga batan-on nga nabiktima sa bullying ug pangabuso di’ sama sa ubang mga lugar sa nasud.
Ug gani ang dakbayan hitsas sa komprehensibo nga mga ordinansa ug mga programa nga nagpalig-on sa kasigurohan sa pagpanalipod sa mga kabataan ug kababainhan gikan sa bullying ug abuso.
RadyoMaN Joel Viray
