Davao City – Subling nisiaw na sab ang riot nahitabo alas 3:30 sa kadlawon didto sa Barangay Leon Garcia sa dakbayan sa Davao.
Daling girespondihan sa kapulisan sa Sta. Ana PNP ang nahitabong riot hinungdan sa pagkasikop sa duha ka suspek nga mao sila si Sherlito Abude Jr., 20 anyos, residente sa San Vicente Gotamco Barangay Leon Garcia Agdao ug laing usa ka Irvin John Aparecio, 18 anyos, nagpuyo sa nasampit nga lugar.
Matud pa kining duha ka mga suspek ang nagpasiugda og riot hinungdan daling gipangsikop sa kapulisan diin nakuhaan pa ang mga suspetsado og usa ka unit Armscor .38 revolver ug laing pang usa ka improvised fire arm kun sumpak lakip ang mga bala.
Ang duha ka dinakpan balhog na sa kapulisan Sta. Ana PNP ug mag atubang og kasong Illegal Possession of Fire Arms and Ammunition.
Samtang pareho nadala sa Southern Philippines Medical Center (SPMC) ang duha ka hamtong ug usa ka menor human gitigbas ug giluba sa nahitabo nga riot sa Kilometer 11, Sasa alas 3:00 sa kadlawon.
Giila ang mga biktima nga sila si Ronald Ayad (27 anyos), Rejie Conie (24 anyos) ug alyas Ronnie (14 anyos), pulos nanimuyo sa Cabayugan Uno, Km 11, Sasa, ning siyudad.
Nakahiagom og samad tinigbasan sa bukton si Ayad, natabas sab ang kamot ni Conie ug nabuslot ang ilok ug paa ni alyas Ronnie human giluba sa wala mailhing mga suspek.
Gilayon gisapupo ang tulo paingon sa SPMC ug base sa pinaka-ulahi nga medical bulletin sa mga biktima anaa na sila as luwas nga kahimtang.
Dili sab masulti sa sekyu sa Traumatic Center sa SPMC kung nalambigit ba sa natigayong riot ang tulo o dili ba kaha nadamay lamang sila.
Sa gihimong pagsusi sa DXDC news team, walay natala ang Sasa PNP nga riot sa ilang area of responsibility.
Radyoman Don Pulayao / RadyoMaN Joel Viray
