Naglab-ot sa 77 ka bag sang dugo ang natipon sang RMN Iloilo sa ginhiwat nga blood letting activity kahapon kadungan sang ika-14 nga anibersaryo sang RMN Iloilo humalin sang gin-relaunch ini sang Hunyo 12, 2006.
Ginpahayag ni Radyoman Ernie Alenciaga, Coordinator sang RMN Blood Donation Drive nga ginakabig sang Red Cross nga overwhelming ang resulta sang Blood letting Activity bangud apesar nga nagapabilin sa Modified General Community quarantine ang siyudad sang Iloilo kag Probinsya sang Guimaras apang madamo pa ang nagboluntaryo sa pag-donar sang dugo.
Kabuylog sang RMN Iloilo sa pagpatigayon sang nasambit nga aktibidad ang Highway Patrol Group, United KIF-ACO, Provincial Government sang Gumaras kag Philippine Red Cross.
Nahibaluan nga nagapanawagan ang Red Cross sa nagkalain-lain nga organisasyon nga maghiwat sang blood donation drive bangud ginakulang na ang supply sang dugo sa Western Visayas.
Suno kay Radyoman Ernie nga ang natipon nga dugo sa RMN Blood Donation Drive nga may tema “Dugo ko, Bulig ko 3” ang mahimo makaluwas sang masobra 300 ka kabuhi nga nagakinahanglan sang dugo.
