Davao City – “Dili gyud pwede nga kanang imong pa-undayonan nimo imong sarili gyud, imong pagkatawo. Dapat kabalo gyud ka unsaon pag-adjust para dili na mudako inyong panagbikil.”
Si Noel Campaña, 35 anyos, usa ka taxi driver nga taga Sitio Badiang, Barangay Sinawilan, Digos City. Siya pipila lamang sa mga drivers nga nakat-on nga musabot sa nagkadaiyang kinaiya sa iyang mga pasahero sa pipila na niya katuig nga pagpamasada.
Apan unsa alang kanila ang Semana Santa? Gina-unsa nila pag obserba niini kauban sa ilang pamilya atol sa tinuig nga Lenten Season?
“Ang Semana Santa, para sa akoa, mao na sya’y pag sakrispisyo sauna sa atong Ginoo dinhi sa kalibutan. Nahuman Niya tanang pagsakripisyo sulod anang mga adlawa. Mao nang ato pong gina-celebrate, ginasaulog. Pag reminisce sa Iyang mga kaagi dinhi sa yuta.”
Gani, gipasabot ni Noel nga nakat-onan usab niining i-aplikar ang maayong kinaiya ngadto sa iyang pamilya labi na diha sa pagsulbad sa mga gina-atubang nga problema kauban ang iyang kapikas sa matag adlaw’ng tanan.
“Ug dunay problema, kami nga magti-ayon, kami nga mag-asawa ang mag-istoryahanay. Actually, saunang panahon sa wala pa mi maka adjust sa usa’g-usa, mura gyu’g away nga kanang.. dili pa ko kabalo mo-handle sa akong pamilya pero by and by, na-learn ra pud nako tungod sa pag celebrate sa pag-abot ning Holy Week kauban ang tibuok pamilya.”
Saysay ni Noel nga aktibo usab sila sa mga buluhaton sa simbahan sa Mahal nga Adlaw sama na lamang sa pag-‘fasting’ ug pagpangamuyo ngadto sa Labawng Makagagahum.
“Ang fasting sa akong sarili, gina dedicate nako akong kaugalingon pinaagi sa pag fasting. Aside ana, naa na pud diha ang paghinolsol sa imong mga sala, sa mga nahimo ug dala na pud ang pagpangamuyo, taasan pa ang lugway sa imong kinabuhi.”
Nanawagan usab si Noel sa tanan nga saulogon nato ang Semana Santa dili lamang pinaagi sa pagbakasyon o unsa pang mga aktibidad nga naandan karong mga panahona apan ang tinuod nga pag obserba sa sakripisyo sa Ginoo pinaagi sa tinuoray nga paghinulsol sa mga kasal-anan.
“Akong mensahe sa tanan nga saulogon nila ang Semana Santa kung unsa ang pagsaulog sa atoang naandan kay tradition naman gud karon sa mga millennial nga sa Semana Santa mangaligo, mao pud nay ilaha. Pero sa akoa, saulogon nato ang Semana Santa isip usa pud ka sakripisyo ni Ginoong Hesu Kristo dinhi sa kalibutan sauna. Ipakita gyud nato nga bisan sa kana lang nga mga adlaw, nagsakripisyo ta tungod pud sa atong mga sala. Ipakita nato sa atong mga sarili, sa ubang mga tawo nga ehemplo pud ta sa paghinulsol.”
Samtang tambag usab ni Noel ngadto sa iyang kaubanang mga drivers nga dili dal-on ang problema sulod sa balay diha sa pagbyahe ug mag-ampo kanunay aron sa Kahitas-an kanunayng magiyahan.
“Ang problema ibilin sa balay, dili dal-on sulod sa sakyanan para makahuna ka’g taas-taas nga panghuna-huna. Ampo lang sa Ginoo nga maayo ang biyahe.”
Sama ni Noel Campaña, unta kita napanalanginan ug nakakat-on sa mga pagtulon-an pinaagi sa paghinumdom nato sa Semana Santa karong tuiga.
RadyoMaN Kirby Manzon
