Davao City – Curious, multi-taskers ug tech-savvy kun maalamon sa modernismo ug teknolohiya: Kini mao ang pipila lamang ka mga kinaiya sa usa ka Millenial kun kadtong nahilakip sa Generation Y kinsa gipanganak sa tuig 1981 hangtod 1996.
Gani sa ilang ka talentado ug ka aktibo sa kinabuhi, ilabi na sagad adunay trabaho, nag eskwela o miyembro sa klase-klaseng organisasyon, sagad kanila mahikalimot na og gahin og oras aron magpasalamat sa Ginoo kinsa gisakripisyo Iyang kinabuhi aron maluwas kita gikan sa paglunang sa kasal-anan…
Karong Semana Santa, unsa ang pamaagi sa mga millenials aron i-komemorar kini?
Nahinabi sa Team RMN Davao ang usa ka young professional ug usa ka call center agent dinhi sa dakbayan sa Davao nga si Sheryl Maybanting, 22 anyos, taga-Compostela, Compostela Valley Province.
Matud ni Sheryl, dili lalim nga manarbaho sa BPO industry ilabi na nga na-assign kini sa gitawag nga ‘graveyard shift’ gani human sa trabaho inay buhaton ang mga giplano sama sa pagsimba karong Semana Santa, pilion na lamang niini nga magpahulay aron makasugakod sa lain na usab nga working day.
“Karon nga naga work nako sa BPO industry, murag kapoy na siya tan-awon and gina isip pod nako nga kung musimba ko tapos murag makatulog ra gihapon ko sulod sa simbahan, mas makasala pa hinuon ko aside sa maka-disturb ko sa ubang manimbahay mas makonsensya pa ko,” saysay niini.
Tug-an pa ni Sheryl nga kaniadtong nag eskwela pa kini. naga bakasyon sila kauban sa iyang pamilya panahon sa Semana Santa.
Apan alang kang Sydonnie Jane Madera, 22 anyos, taga-Toril, bag-ohay lang mi-gradwar isip Mass Communication Student sa Ateneo de Davao University, kinsa nagdako uban ang iyang mga apohan, gina-komemorar nila ang Lenten Season pinaagi sa pagpuyo lang sa balay ug dili ginahimong bakasyon ang Holy Week.
“Ako-ang family is very religious, si lola naga apil gyod sa Way of the Cross and naga participate sa mga activities sa church labi na nang pagpangumpisal, recollection and masses during Holy Week and difference lang siguro kay sa una sila tanan as a family pero nagtigi-tigi naman sila karon so si lola, lolo ug ako nalang,” matud niini.
Nagapaningkamot usab si Sydonnie nga mag fasting, pagtambong sa misa ingon man pagbasa sa bibliya ug paghimo og devotionals matag adlaw.
Unsa ba alang sa duruha isip usa mga millennial ang matuod nga tumong sa Lenten Season?
“Ang Lenten Season kay para mag repent ka sa imong mga sala,” alang kang Sheryl.
Samtang para kang Sydonnie, usa kini ka tinuig nga paghinumdom kung unsa kadaku ang gugma sa Ginoo alang kanato.
“Imagine kinsa ba gyod nga tao ang magpakamatay para sa imong mga sala nga dapat kita man dapat ang parusahan pero siya ang ni-ako sa parusa ing-ana ta niya kahigugma… Unta ma-remind sila nga although God is a forgiving God, although God is a loving God but He is not a tolerating God kay dili joke ang magpakamatay sa krus,” butyag ni Sydonnie.
Gawas sa pag-ampo, fasting, alms giving, usa usab sa hagit sa Lenten ang pagpasaylo ug repentance sa sala.
“Sa tinud-anay depende pod gyod siya sa nakasala sa imoha syempre magpasaylo ka pero ang naa sa imong heart dili pa gyod siya ana ka okay, so mag take time gyod siya pero of course paningkamutan nako nga mapasaylo ‘tong tao nga nakasala sa akoa,” segun ni Sheryl.
Isip usab usa ka millennial, dali lang kang Sydonnie ang mangayo og pasaylo.
“Pag pangayuan tag pasaylo lahi-lahi man gud ang sala sa ato, naay bug-at ug naa poy gaan pero unta i-open nato atong hearts na i-forgive though dili siya dali pero kailangan nato na himuon kay gusto man ‘ta mangayo og pasaylo sa Ginoo pero di ta niya mapasaylo kung kita mismo di kabalo mupasaylo so kailangan nato i-let go,” butyag pa ni Sydonnie.
Karong Semana Santa, nunot sa modernong panahon nga usa ka factor sa pagka-distract sa kabatan-onan sa direktang pakig-relasyon ug komunikasyon sa Ginoo, hinaut nga kitang mga millenials mas mulig-on pa ang pagtoo ug ma-realisar ang pagbalanse sa oras sa kalibutanong responsibilidad ug pagbutang sa Ginoo diha sa unahan ilabi na diha sa atong mga prayoridad.
Matud sa Mt 3:16 “But seek first God’s Kingdom, and His righteousness; and all these things will be given to you as well.”
RadyoMaN Jason Amisola
