Subling gipatuman sa Department of Interior and Local Government (DILG) ang road clearing operations.
Kini subay sa Memorandum Circular (MC) no. 2020-145 sa mao nga buhatan.
Sa interview sa RMN ngadto kang Engr. Carmelo Libot, ang Provincial Director sa DILG-Bukidnon gibutyag niini nga nagsugod ang ang implementasyon sa mao nga kamanduan niadtong Lunes, November 16 kung asa pipila sa mga angayang himoon ang pagkuha sa mga nakaharang sa mga kalye ug sidewalks nga mamahimong magmugna sa peligro sa mga motorista ug pedestrian.
Matud ni Engr. Libot nga base sa ilang monitoring nagsugod na usab sa road clearing operations ang mga local government unit sa Bukidnon.
Apil usab sa tumong niini nga papason ang mga illegally parked nga mga sasakyan, gawas sa mga ambulances ug public emergency vehicles, mga nakaharang nga road signage ug mga iligal nga istraktura sa mga pampublikong dalan.
Ang deadline nga gihatag sa DILG para sa road clearing operation sa mga LGUs karong Enero 15, 2021 aron masiguro ang pagsunod niini sa road clearing memorandum.
