Gikalipay sa mga residente sa kabukiran ning syudad ang padayong pagsemento sa mga kadalanan diin daghan niini mga road openings ug connectivity.
Matud sa Cagayan de Oro City Information Office nga tumong sa administrasyon ni Mayor Oscar Moreno nga mabuksan ug masumpay ang mga kadalanan alang sa malangkubong paglambo sa ekonomiya sa syudad diin dako og kalambigitan niini ang mga mag-uuma ug molupyo sa kabukiran.
Lakip sa mga road openings ug connectivity projects nga gipatuman sa City Engineering Office mao ang Sitio Balongkot sa Brgy Dansolihon nga mosumpay sa Sitio Batinay sa Brgy Tagpangi.
Gibutyag ni Mayor Moreno nga mas sayon ug paspas na ang paglihok-lihok sa mga molupyo kay dili na kinahanglang pang monaog sa Barangay Lumbia.
Nasayran nga gibuksan na usab ang dalan sa Sitio Pamalihi sa Brgy Pagatpat nga mosumpay usab sa Brgy Lumbia ug laumang matibawas kini sa dili pa matapos ang ikaduhang termino ni Mayor Moreno.
