Davao City – Ang kakulang sa disiplina sa mga drivers maoy sagad hinungdan sa mahitabong ngilngig nga disgrasya sa kadalanan sama sa nahitabo sa may Matina Pangi nga mikutlo og napulo ka kinabuhi human gidaro sa Wing Van nga may kargang sinakong bugas ang lima ka sakyanan ug lima ka motor kagahapong adlawa.
Matud ni kanhi Inter-Agency Traffic Council (I-ACT) Deputy Executive Director Elmer Organo nga kun may disiplina pa ang mga drivers ug responsable una mularga, sigurohon gayod ang kondisyon sa gisakyang behikulo aron kalikayan ang disgrasya sa kadalanan.
Gi-angkon ni Organo nga natural lang nga adunay mga disgrasya sa dalan apan gibarugan niini nga puwede kining kalikayan kung susihon una sa mga drivers ang kondisyon sa sakyanan ug musunod sa balaud-trapiko.
Ehemplo niini ang pagkawala sa preno sa truck nga gimanehoan sa usa ka Joel Aras maong nadaro niini ang kasugat ug gisundan nga lima ka sakyanan ug lima ka motor resulta sa pagkamatay sa mga pasa hero tungod sa kakusog sa impact sa pagkabangga.
Aron maleksiyon ang driver ug ang operators sa ilang kapabayaan, sugyot ni Organo nga mas maayong pabug-atan ang silot inay nga homicide lamang, himoon kining murder ug dili na tugotan ang negosasyon sa matag kampo tumong aron pugngan ang pagpasang-at og kaso batok sa mga responsible sa hitabo.
RadyoMaN Joel Viray
