Davao City – Gikasakit sa kasing-kasing sa Philippine National Police Regional Office (PRO-XI) ang nahimong komento ni Vice-President Leni Robredo nga pakyas kun palpak ang ‘war on drugs’ dinhi sa Pilipinas.
Matud ni newly-installed PRO-XI spokesperson Maj. Eudisan Gultiano atol sa gipahigayong AFP-PNP Press Conference, pagpakita lamang kini nga kulang ang panabot sa bise-presidente sa matuod nga estado sa maong kampanya.
Dugang ni Gultiano, wala usab na-rekognisar ni Robredo ang 53 ka mga pulis kinsa gisakripisyo ang ilang mga kinabuhi tungod ug alang sa malampusong anti-illegal drug operations.
Sa datos sa PRO-XI, adunay 5,878 ka mga nagmalampuson nga anti-drug operations sukad gilusad ang enhanced anti-drug campaign niadtong 2016 hangtod December 2019 diin miresulta kini sa pagkaaresto sa 6,459 illegal drug violators ug pagka-neutralisar sa 290 illegal drug personalities.
Gumikan sa maong kampanya, mikunhod sa 6,465 incidents ang index crime sa 2016 gikan sa 11,107 sa 2015 ug nagpadayon sa pagkanaug sa 5,020 sa 2017; 3,791 sa 2018 ug 2,788 sa 2019.
Gibarugan usab ni Gultiano nga dili pakyas ang maong programa sa gobyerno sanglit padayon ang suporta sa katawhan niini ug makita kini sa bag-ohay lamang migawas nga high approval rating sa presidente nga misaka sa 82% based sa SWS Survey.
RadyoMaN Jason Amisola
