Davao City – Dili mamahimo nga dili mangandoy ang mga Pilipino nga momaayo ang dagan sa atong kinabuhi pagsulod sa Bag-ong Tuig 2020 gumikan hangtud may kinabuhi, may nagpaabot nga paglaum alang pag-asenso sa usaka tawo.
Gibutyag ni DILG-XI Director Alex Roldan nga ang mangandoy natural lamang kini nga batasan sa usaka tawo nga samtang may kinabuhi, ang pangandoy nga mo-angat ang kinabuhi pag-abot sa laing tuig dili mamatay kun mapapas sa hunahuna ug sa kasingkasing sa mga tawo gawas lang kun walay buhaton nga lakang aron mulambo ang panginabuhi.
Matud ni Roldan, lauman sa katawhang Pilipinhon nga aduna gayu’y mahitabong pag-asenso dungan sa pagsulod sa Bag-ong Tuig nga wala masinati sa 2019 gumikan sa padayon nga pagsaka sa trust ug approval rating ni Pres. Rodrigo Duterte.
Matud ni Roldan, ang padayon nga pagsalig sa kinabag-ang duot sa katawhan adunay dakung impact sa atong pangkalibutanong komunidad diin mao unya kini ang mopahigmata sa ubang kanasuran aron musalig sila sa lig-ong panggobyerno, pulitika ug ekonomiya dinhi sa nasud.
Gi-awhag ni Roldan ang katawhang Pilipino nga ablihan ang ilang salabutan sa mga paglaum uban sa pagsalig sa mga namuno sa kagamhanan karon aron ang tanang pangandoy mahimong posible ug matinood ang damgo ug pangandoy nga makatilaw og pag-angat sa kinabuhi dinhi sa Pilipinas.
RadyoMan Joel Viray
