Nag-umpisa na kahapon nga adlaw ang vaccination roll-out program sa mga medical health workers sa 23 ka mga referral hospital sa rehiyon dose gamit ang Sinovac Vaccine.
May-angot sini, mismo si DOH-12 Regional Director Dr. Aristedis Tan ang una nga nagpabakuna sang Sinovac vaccine bilang Officer In Charge sang CRMC sa duha ka libo nga mga empleyado sang ospital sa pag umpisa sang rollout vaccination sa mga medical frontliners sa rehiyon kahapon nga adlaw.
Pahayag ni RD Tan nga paagi sa nasambit nga vaccination program mangin dalan ini agud nga masolusyunan ang pandemya.
Dugang niya pa nga indi man syento porsyento nga indi na malatnan sang COVID -19 kon nabakunahan kundi maprotektahan lang batok sa malala nga epekto sang virus.
Apela naman ni Director Tan sa publiko ilabi na sa mga senior citizen nga amo ang masunod nga bakunahan nga luwas ang bakuna kag wala sang dapat nga ikahadlok tungod ang importante may proteksyon batok Covid -19.
Base sa datos sang DOH 12 kabug-usan nga 8,967 ka mga medical health workers sang 23 ka mga referral hospitals sa rehiyon dose ang mabakunahan sang Sinovac vaccine.
Nahibaluan nga ang Cotabato City ang may-yara sang alokasyon nga 2, 138 para sa duha ka referral hospital nga amo ang CRMC kag Cotabato Sanitarium, General Santos City-3,138 para sa 6 ka mga hospital, North Cotabato – 441 para sa apat ka mga ospital, Saranggani – 336 para sa 2 ka ospital, South Cotabato – 1,838 para sa 5 ka ospital kag Sultan Kudarat 1,076 para sa apat ka mga ospital.
