Alabel, Sarangani Province–Ang Sarangani , Police Provincial Office, nagahimo usab og makuting imbestigasyon aron masuta unsay gyud ang motibo sa pagpatay sa tulo ka mga biktimang nakaplagan sa managlahing lugar partikular na sa Malungon ug Alabel.
Sumala ni Police Lt. Colonel, Teody Condesa- tigpamaba sa SPPO posibleng sa laing lugar gipatay ang mga nahisgutan og igo nalang gilabay ang ilang lawas sa Sarangani.
Matud ni Condesa nga daghan ang posibleng hinungdan sa pagpatay sa mga nahisgutan apan kinahanglan pang sutaon unsa gyud ang pinakaduol nga motibo.
Ginakonsidera lang usab ni Police Col. Teody Condesa nga isolated case ang pagkakaplag sa mga patayng lawas sa tulo nga mga biktima sa salvage.
Matud sa opisyal nga kung basehan ang crime rate sa probinsya, gamay lamang ang mga natala og panagsa ra ang mga susama ka dagko nga mga panghitabo.
Malaumon si Condesa nga gilayong masolbad ang maong mga kaso pinaagi sa imbestigasyon sa kapulisan sa Alabel kaabag ang Provincial Police Office.
Samtang mas hugot nga checkpoint pasulod sa Alabel ang usa sa nakit-ang lakang ni Lt. Col Condesa aron malikayan ang susamang panghitabo sa diin gihimong dumping site o labayanan og biktima ang Sarangani.
Sumala ni Condesa nga kinahanglan ang round the clock nga pagbantay aron masigurong dili malutsan sa mga criminal ang ilang lugar bisan unsang orasa.
Nagtuo si Condesa nga mas maayong palabihan ang hugot nga pagbantay sa dis-oras sa gabii tungod ingon anang mga higayona ginahimo sa mga kriminal ang ilang mga laraw.(Jordan Britos)
